मंगळवेढा टाईम्स वृत्तसेवा:-
भाजप खासदार डॉ. जयसिद्धेश्‍वर शिवाचार्य महास्वामी यांचा बेडा जंगम जातीचा अनुसूचित जातीचा दाखला बनावट असल्याचा अहवाल सोलापूरच्या जात पडताळणी समितीने दिला आहे. याप्रकरणी समितीने खासदार डॉ. जयसिद्धेश्‍वर महास्वामी यांना नोटीस बजावली असून, येत्या शनिवारपर्यंत (ता. १८) त्यांना म्हणणे मांडण्याची मुदत दिली आहे.
या प्रक्रियेतून जातीचा दाखला बनावट असल्याचे अंतिमत: सिद्ध झाल्यास डॉ. जयसिद्धेश्‍वर शिवाचार्य महास्वामी यांचे सदस्यत्व रद्द होवून लोकसभेची पोटनिवडणूक जाहीर होवू शकते.
अनुसूचित जातीसाठी आरक्षित असलेल्या सोलापूर लोकसभा मतदारसंघातून 2019 च्या निवडणुकीत खासदार डॉ. जयसिद्धेश्‍वर शिवाचार्य महास्वामी हे भाजपकडून विजयी झाले आहेत.
नुरंदस्वामी गुरुबसय्या हिरेमठ ऊर्फ खासदार डॉ. जयसिद्धेश्‍वर शिवाचार्य महास्वामी यांचे जात प्रमाणपत्र बनावट असल्याची तक्रार करत याबाबतचे पुरावे ही तक्रारकर्त्यांनी दिले होते. या पुराव्यावर समितीने चौकशी केली आहे. लिंगायत हा पंथ असून अनुसूचित जाती पैकी नाही. बेडा जंगम ही जात लिंगायत पंथ समूहातील नसून वेगळी असल्याचे निरीक्षण या अहवालात नोंदविण्यात आले आहे. 15 जानेवारी 1982 रोजी खासदार डॉ. महास्वामी यांनी काढलेल्या बेडा जंगम जातीच्या जात प्रमाणपत्राबाबत दक्षता समितीने सखोल चौकशी केली आहे.
1982 मधील जात प्रमाणपत्र नोंदणीसाठी दोन रजिस्टर असल्याचे दिसून आले असून, जात प्रमाणपत्र नोंद असलेल्या रजिस्टरमधील नोंदीमध्ये, अक्षरबदल, शिक्का बदल व नोंदी अलीकडच्या काळातील असल्याचे चौकशी अधिकाऱ्यांच्या निदर्शनास आले असल्याचा अभिप्राय अहवालात दिला आहे.
कोणत्याही टिप्पण्‍या नाहीत:
टिप्पणी पोस्ट करा